foxINDUSTRY
Витебск.Вид на Свято-Воскресенскую церковь
Уніяцкая Уваскрасенская царква адыгрывала важную ролю ў ансамблі Рынкавай плошчы. Храм арыентаваўся алтаром на поўнач, а гадоўным фасадам, як і ратуша, – да Віцьбы. На яе месцы раней стаяла драўляная праваслаўная, таксама Уваскрасенская, царква. Прыгожы гмах у стылі позняга барока вызначаўся маляўнічым сілуэтам, плаўнымі абрысамі вежаў і франтонаў, вертыкалізмам прапарцыянальнага ладу.

Аднанефавы храм меў паўкруглую апсіду з рызніцамі па баках, якія надавалі плану прамавугольную форму. Вышэй рызніц уздымалася светлавая апсіда алтара, завершаная выгнутым фігурным атыкавым франтонам. Дзвюхвежавы галоўны фасад вылучаўся складанай хвалістай паверхняй, якая стваралася дынамічнай групоўкай моцна выцягнутых вертыкальных ордэрных элементаў. Пластыка фасадаў узбагачалася дугападобнымі лініямі карнізаў, ажурнымі вежамі з фігурнымі купалкамі, дынамічным разваротам карынфскіх калон па вуглах выступаючага нартэкса. Зараз Уваскрасенская царква аднаўлена ў сваім першапачатковым выглядзе.